Dərman vasitəsinin istifadəsi üzrə təlimat (xəstələr üçün)

 

HELİ-STOP örtüklü tabletlər

ХЕЛИ - СТОП

 

Beynəlxalq patentləşdirilməmiş adı: bismut trikalium disitrat

 

Tərkibi

Təsiredici maddə: 120 mq bismut oksidinə ekvivalent 300,0 mq bismut trikalium disitrat

Köməkçi maddələr: povidon K-17, makroqol, maqnezium stearat, krospovidon, qarğıdalı nişastası. Tabletin örtüyünün tərkibində hipromelloza, metakril turşusu /etakrilat sopolimeri (1:1), talk, titan dioksidi, triasetin.

 

Təsviri

Dairəvi ikitərəfli qabarıq, ağ və ya ağımtıl rəngli örtüklü tabletlər

 

Farmakoterapevtik qrupu

Bağırsaq antiseptiki və bürüyücü vasitə

 

ATC kodu: А02ВХ05.

 

Farmakoloji xüsusiyyətləri

Farmakodinamikası

Heli-Stop xoraəleyhinə Helicobacter pylori-yə bakterisid aktivliyi olan vasitədir. Həmçinin, iltihabəleyhinə və bürüyücü təsirlərə malikdir.

Mədənin turş mühitində həllolmayan bismut oksixlorid və sitrat çöküntüləri əmələ gətirir. Zülal substratı ilə birləşməsi nəticəsində yaranan xelat birləşmələr xora və eroziyaların üzərində müdafiə qatı əmələ gətirir. Beləliklə, preparat müdafiə qatı yaradır və unun vasitəsilə uzun müddət boyunca selikli qişanın zədələnmiş hissələrini aqressiv amillərin təsirindən qoruyur. Heli-Stop prostaqlandin E-nin sintezini, selik yaranmasını, hidrokarbonatların ifrazını artırmaqla, sitoprotektor mexanizmlərin aktivliyini stimulə etməklə, həzm traktının selikli qişasının pepsin, duz turşusu, fermentlər və öd turşusu duzlarına müqavimətini artırır. Selikli qişanın defekti nahiyəsində epidermal böyümə faktorunun toplanmasına gətirib çıxarır. Pepsinin aktivliyini azaldır.

Farmakokinetikası

Demək olar ki, həzm traktından sorulmur. Əsasən nəcis vasitəsilə xaric olunur. Plazmaya keçmiş cüzi miqdarda bismut orqanizmdən böyrəklər vasitəsilə çıxarılır.

 

İstifadəsinə göstərişlər:

Mədə və 12 b.b. xorasının kəskinləşməsi dövrü, o c. Helicobacter pylori ilə assosiasiya olunmuş.

Xronik qastrit və qastroduodenit kəskinləşmə dövründə, o c. Helicobacter pylori ilə assosiasiya olunmuş.

Əsasən ishal əlamətləri ilə keçən bağırsağın qıcıqlanması sindromu

Həzm traktının üzvi xəstəlikləri ilə əlaqədar olmayan funksional dispepsiya

Əks göstərişlər

Bismut trikalium disitrata qarşı yüksəlmiş həssaslıq; hamiləlik və südvermə dövrü; dekompensasiya olunmuş böyrək çatışmazlığı; 4 yaşadək uşaqlar

 

Xüsusi göstərişlər və ehtiyat tədbirləri

Preparat 8 həftədən çox qəbul olunmamalıdır. Müalicə dövründə uşaqlar və böyüklər üçün tövsiyə olunan sutkalıq dozaları aşmaq tövsiyə olunmur. Müalicə dövründə bismut tərkibli digər preparatları qəbul etmək tövsiyə olunmur. Tövsiyə olunan dozalarda qəbulu zamanı müalicə kursunun sonunda aktiv təsiredici maddənin qan plazmasında konsentrasiyası 3-58 mkq/l-dən yüksək olmur, intoksikasiya halları isə yalnız 100 mkq/l konsentrasiyasında müşahidə olunur. Heli-Stop qəbulu zamanı bismut – sulfidin yaranması nəticəsində nəcis tünd rəngə boyana bilər. Bəzən dilin azacıq tündləşməsi mümkündür. Müalicə zamanı alkoqol istifadəsi tövsiyə olunmur.

 

Digər dərman vasitələri ilə qarşılıqlı təsiri

Preparatın qəbulundan 30 dəq əvvəl və sonra daxilə digər dərman preparatları (xüs. antasidlər), həmçinin, qida və maye (məs.süd, meyvələr, meyvə şirəsi) qəbul etmək tövsiyə olunmur. Bunlar eyni zamanda qəbul olunduqda dərman preparatının effektivliyini azalda bilər. Bismut preparatları tetrasiklinlərin sorulmasını azaldır. Preparat bismut tərkibli digər preparatlarla yanaşı qəbul olunmamalıdır, çünki, eyni zamanda bismut tərkibli bir neçə preparatın qəbul olunması əlavə təsirlərin, o cümlədən ensefalopatiyanın inkişafı riskini artırır.

 

Hamiləlik və laktasiya dövründə istifadəsi

HeliStopun hamiləlik dövründə təyinatı əksgöstərişdir. Südvermə dövründə qəbuluna ehtiyac olarsa südlə qıdalandırmanı dayandırmaq lazımdır.

 

Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri

Bismut trikalium disitratın nəqliyyat vasitəsini və digər təhlükəli mexanizmləri idarəetmə qabiliyyətinə təsiri haqda məlumatlar yoxdur.

 

İstifadə qaydası və dozası

Daxilə qəbul olunur. Müalicə kursunun davametmə müddəti və preparatın dozası fərdi olaraq həkim tərəfindən təyin olunur.

Böyüklərə və 12 yaşdan yuxarı uşaqlara 1 tablet gündə 4 dəfə, hər qida qəbulundan (səhər, nahar və şam yeməkləri) 30 dəq əvvəl və gecə yuxusundan qabaq, və ya 2 tablet sutkada 2 dəfə qida qəbulundan 30 dəq əvvəl (səhər və şam yeməkləri) qəbul olunur.

8 - 12 yaş arasında uşaqlara 1 tabletdən gündə 2 dəfə qida qəbulundan 30 dəq əvvəl (səhər və şam yeməkləri) qəbul olunur.

4 - 8 yaş arasında uşaqlara bədən çəkisindən asılı olaraq 8 mq/kq/sutkada olmaqla sutkalıq doza 2 dəfəyə bölünərək qəbul olunur. Tabletlər qida qəbulundan 30 dəq əvvəl, kifayət miqdarda su ilə  daxilə qəbul olunur.

Tabletlər bütöv şəkildə, çeynənmədən və xırdalanmadan, kifayət qədər su ilə qəbul olunmalıdır. Tabletləri süd ilə qəbul etmək olmaz. Müalicə kursu adətən 4-8 həftə təşkil edir. Preparatın qəbulu bitdikdən sonra 2 ay müddətində bismut tərkibli preparatları qəbul etmək tövsiyə olunmur. Helicobacter pylori – nin eradikasiyası məqsədilə bismut trikalium disitratı antihelikobakter aktivliyi olan antibakterial preparatlarla birgə qəbul etmək məqsədəuyğundur. Müalicə əsnasında yaxşılaşma müşahidə olunmursa müalicə həkiminə müraciət etmək lazımdır.

 

Əlavə təsirləri

Əlavə  təsirlərin  tezliyi  aşağıdakı  parametrlərlə  təyin  edilir:

çox  tez-tez (≥ 1/10); tez-tez (≥ 1/100 - < 1/10); bəzən (≥ 1/1000 - < 1/100);  nadir hallarda

(≥  1/10000 - < 1/1000); çox  nadir  hallarda (< 1/10000); məlum  deyil (əldə  olan  məlumatlar  görə  tezliyi  qiymətləndirmək  mümkün  deyil).

Həzm traktı tərəfindən: çox tez-tez – nəcisin qara rəngə boyanması; bəzən – ürəkbulanma, qusma, ishal və ya qəbizlik.

Dəri və dərialtı toxumalar tərəfindən: bəzən – dəridə səpği, qaşınma.

İmmun sistem tərəfindən: çox nadir hallarda – anafilaktik reaksiyalar.

Sinir sistemi tərəfindən: çox nadir hallarda – uzun müddət yüksək dozalarda qəbulu zamanı – MSS-də bismutun toplanması ilə əlaqədar ensefalopatiya

Əlavə təsirlər geridönən xarakter daşıyır və preparatın qəbulu dayandıqdan sonra aradan qalxır. Əgər bu əlamətlər preparatın qəbulu dayandırıldıqdan sonra kəskinləşirsə müalicə həkiminizə məlumat verin. Əgər təlimatda göstərilməyən hər hansı digər əlamət meydana çıxıbsa müalicə həkiminizə məlumat verin.

 

Doza həddinin aşılması

Tövsiyə olunan dozalardan daha yüksək dozalarda uzunmüddətli qəbulu nəticəsində pasiyentdə böyrək funksiyasının pozulması müşahidə oluna bilər. Bu əlamətlər geridönən xarakter daşıyır və preparatın qəbulu dayandırıldıqdan sonra aradan qalxır. Doza həddinin aşılması əlamətləri meydana çıxdıqda mədənin yuyulması, aktiv kömür və işlədicilərin qəbulu tövsiyə olunur. Daha sonra müalicə simptomatik aparılır. Böyrək funksiyasının pozulması zamanı plazmada bismutun səviyyəsinin yüksəlməsi müşahidə olunarsa kompleks əmələ gətirən preparatlar – D-penisillamin, unitiol yeritmək tövsiyə olunur. Böyrəklərin funksiyasının ağır pozulması müşahidə olunarsa hemodializ aparılır.

 

Buraxılış forması

14 tablet, blisterdə. 4 blister, içlik vərəqə ilə birlikdə karton qutuya qablaşdırılır.

 

Saxlanma şəraiti

25ºС  temperaturdan  yüksək  olmayan, işıqdan  qorumaqla  və uşaqların əli çatmayan yerdə saxlamaq lazımdır.

 

Yararlılıq müddəti

2 il.

Yararlılıq müddəti bitdikdən sonra istifadə etmək olmaz.

 

Aptekdən buraxılma şərti

Reseptsiz buraxılır.

 

İstehsalçı

ABBA, Rusiya

 

Ünvan

ABBA, Rusiya, 610044, Kirov ş-i, Luqanskaya-53A