Dərman vasitəsinin istifadəsi üzrə təlimat (xəstələr üçün) KOKSİTEM örtüklü tabletlər COXITEM Beynəlxalq patentləşdirilməmiş adı: Etoricoxib Tərkibi Təsiredici maddə: 1 tabletdə 90 mq və ya 120 mq etorikoksib vardır. Köməkçi maddələr: natrium nişastaqlikolyat, mikrokristallik sellüloza, laktoza, polivinilpirrolidon, qarğıdalı nişastası, maqnezium stearat, krospovidon, natrium laurilsulfat, kolloidal silisium dioksid, natrium kroskarmelloza, izopropil spirti, metilen dixlorid, rəngləyici maddə (sarı rəngli örtük FCGS-1(QT5211213A) (90 mq), yaşıl rəngli örtük FC4W-P (BQ5290120A) (120 mq)). Təsviri Koksitem 90 mq Sarı rəngli, ikitərəfli qabarıq, örtüklü tabletlərdir. Koksitem 120 mq Yaşıl rəngli, kapsul formasında, ikitərəfli qabarıq, bir tərəfində kəsim xətti olan örtüklü tabletlərdir. Farmakoterapevtik qrupu Qeyri-steroid İltihab əleyhinə preparat, yüksək selektiv SOG-2 inhibitoru, koksiblər. ATC kodu: M01AH05. Farmakoloji xüsusiyyətləri Farmakodinamikası Qeyri-steroid iltihab əleyhinə preparat. Selektiv SOG-2 inhibitoru, terapevtik konsentrasiyalarda prostaqlandinlərin sintezini blokada edir və iltihab əleyhinə, ağrıkəsici və qızdırmasalıcı təsir göstərir. SOG-2 fermentinin selektiv inhibə olunması iltihabi proseslə əlaqədar olan klinik əlamətlərin şiddətliliyini azaltdığı halda trombositlərin funksiyası və MBT-nın selikli qişasına təsir göstərmir. Etorikoksib sutkada 150 mq dozada qəbul edildiyində SOG-2 fermentini dozadan asılı şəkildə inhibə edir, SOG-1 fermentinə təsir göstərmir. Mədənin selikli qişasında prostaqlandinlərin sintezinə və qanaxma müddətinə təsir göstərmir. Aparılmış tədqiqatlarda kollagenlə törədilmiş araxidon turşusunun səviyyəsinin və trombositlərin aqreqasiyasının azalması müşahidə olunmayıb. Farmakokinetikası Daxilə qəbuldan sonra etorikoksib MBT-dan tez sorulur. Daxilə qəbul zamanı biomənimsənilmə 100%-dəkdir. Cmax böyüklərdə acqarına qəbul zamanı 3,6 mkq/ml, Tmax – qəbuldan sonra 1 saatdır. 120 mq dozada preparatın qəbulu zamanı qida qəbulu etorikoksibin sorulmasının şiddəti və sürətinə əhəmiyyətli təsir göstərmir. Bununla yanaşı Cmax 36% azalır, Tmax isə 2 saatadək uzanır. Plazma zülalları ilə birləşmə 92%-dən artıqdır. Etorikoksib plasenta və HEB-dən keçir. İntensiv şəkildə P450 sitoxrom izofermentlərinin iştirakı ilə qaraciyərdə 6-hidroksimetil-etorikoksib və digər metabolitlərin yaranması ilə metabolizmə uğrayır. Əsas metabolitlər SOG-1-ə təsir göstərmir, SOG-2-yə münasibətdə isə ya qeyri-aktiv, ya da az aktivdirlər. Böyrəklərlə metabolitlər şəklində ifraz olunur. 1%-dən az miqdarı dəyişilməmiş şəkildə ifraz olunur. Böyrək funksiyasının yüngül pozulması olan pasiyentlərdə etorikoksibin 60 mq/sutkada birdəfəlik qəbulu AUC-un sağlam şəxslərlə müqayisədə 16% yüksəlməsi ilə müşayiət olunur. Böyrək funksiyasının orta ağırlıqlı pozulması olan pasiyentlərdə etorikoksibin 60 mq/bir gündən bir qəbulu zamanı AUC göstəriciləri eyni dozanı hər gün qəbul edən sağlam şəxslərlə eyni olmuşdur. Hemodializ preparatın eliminasiyasına zəif təsir göstərir. İstifadəsinə göstərişlər Osteoartroz, revmatoid artriti, ankilozlaşan spondilitin simptomatik müalicəsi; kəskin podaqrik artritlə bağlı olan ağrı və iltihab əlamətləri; stomatoloji əməliyyatın keçirilməsi ilə əlaqədar olan ağrının qısamüddətli müalicəsi Əks göstərişlər Bronxial astma, burun və ya burunətrafı ciblərin resdivləşən polipozunun müştərək müşahidə olunması və asetilsalisil turşusu və ya digər QSİƏP-lərə qarşı dözümsüzlük (həmçinin, anamnezdə) Mədə və 12 barmaq bağırsağın selikli qişasının eroziv-xoralı dəyişiklikləri, aktiv mədə-bağırsaq qanaxması, serebrovaskulyar və ya digər qanaxmalar. Kəskinləşmə fazasında bağırsaqların iltihabi xəstəlikləri (Kron xəstəliyi, qeyri-spesifik xoralı kolit). Hemofiliya və digər laxtalanma pozğunluqları Ciddi ürək çatışmazlığı (NYHA təsnifatı ilə II-IV funksional siniflər). Ciddi qaraciyər çatışmazlığı və ya qaraciyərin aktiv xəstəliyi. Ağır dərəcəli böyrək çatışmazlığı (YK 30 ml/dəq-dən aşağı), böyrəklərin proqressivləşən xəstəlikləri, təsdiqlənmiş hiperkaliemiya Aortokoronar şuntlamadan sonrakı dövr; periferik arteriyaların xəstəlikləri, serebrovaskulyar xəstəliklər, qabarıq klinikalı ÜİX. AT – 140/90 mm.c.süt-dan yüksək davamlı arterial hipertenziya Hamiləlik, laktasiya dövrü 16 yaşadək uşaqlar və yeniyetmələr Etorikoksibə qarşı həssaslığın yüksəlməsi Xüsusi göstərişlər və ehtiyat tədbirləri Etorikoksib anamnezində MBT-nın xoralı zədələnmələri, Helicobacter pylori infeksiyası olan, uzun müddət QSİƏP alan pasiyentlərdə, yaşlı şəxslərdə, ağır somatik xəstəliklərdə, dislipidemiya/hiperlipidemiya, şəkərli diabet, arterial hipertenziya, ödemlər və maye ləngiməsi, siqaretçəkmə, 60 ml/dəq-dən aşağı YK, müəyyən dərman preparatları (antikoaqulyantlar, məs., varfarin; antiaqreqantlar, məs., asetilsalisil turşusu, klopidoqrel: qlükokortikosteroidlər, məs., prednizolon; serotoninin geriyə tutulmasının selektiv inhibitorları, məs., sitalopram, flüoksetin, paroksetin, sertralin) ilə müalicə alan pasiyentlərdə, xronik alkoqolizm zamanı ehtiyatla istifadə olunmalıdır. Müalicə dövründə AT-in səviyyəsinə ilk 2 həftə ərzində ciddi, sonradan isə mütəmadi nəzarət olunmalıdır. Müalicə dövründə böyrək və qaraciyərin funksiyalarının göstəricilərinə mütəmadi olaraq nəzarət olunmalıdır. Qaraciyər transaminazalarının aktivliyinin 3 dəfə və daha çox artması müalicənin dayandırılması üçün göstərişdir. Müalicənin davametmə müddəti ərzində arzuolunmaz əlavə təsirlərin inkişafı riskinin yüksəldiyini nəzərə alınmalı və mütəmadi olaraq müalicənin davam etdirilməsinin vacibliyi və dərmanın dozasının azaldılması ehtimalı dəyərləndirilməlidir. Digər QSİƏP-larla yanaşı təyin olunmamalıdır. Etorikoksib qida qəbulları arasında qəbul olunduqda effekti daha tez başlayır. Digər dərman vasitələri ilə qarşılıqlı təsiri Varfarin və ya digər analoji preparatlar alan pasiyentlərdə müalicənin əvvəlində və ilk bir neçə gün ərzində qanın laxtalanma göstəricilərini (xüsusilə də dozanın dəyişdirilməsi zamanı) nəzarət altında saxlamaq lazımdır. Qeyri-selektiv QSİƏP-lər və selektiv SOG-2 inhibitorları AÇF inhibitorlarının hipotenziv effektini zəiflədir. Xüsusilə, böyrək funksiyasının pozulması zamanı (məs. dehidratasiya və ya yaşlı pasiyentlərdə) bu kombinasiya böyrəyin funksional çatışmazlığını daha da dərinləşdirə bilər. Etorikoksib ürək-damar xəstəliklərinin profilaktikası üçün istifadə olunan kiçik dozada asetilsalisil turşusu ilə yanaşı qəbul olunduqda MBT-nın xoralı zədələnmələrinin tezliyi arta bilər. Siklosporin və takrolimus etorikoksibin nefrotoksiklik riskini yüksəldir. Etorikoksib və digər qeyri-selektiv QSİƏP-lər plazmada litiumun və metotreksatın səviyyəsini artıra bilər. Oral kontraseptivlərlə yanaşı etorikoksibin qəbulu zamanı tromboemboliya riski yüksələ bilər. Etorikoksib diqoksinin Cmax-na təsir göstərərək artıra bilər. Rifampisin və etorikoksibin yanaşı istifadəsi zamanı sonuncunun plazmada AUC-un azalmasına gətirib çıxarır. Hamiləlik və laktasiya dövründə istifadəsi Preparatın hamiləlik və laktasiya dövründə istifadəsi əks göstərişdir. Etorikoksib qadın fertilliyinə mənfi təsir göstərə bilər, buna görə hamiləlik planlayan qadınlara tövsiyə olunmur. Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri Başgicəllənmə, yuxululuq və ya zəiflik kimi əlavə təsirlərin yaranma ehtimalını nəzərə alaraq nəqliyyat vasitəsini və digər potensial təhlükəli mexanizmləri idarəetmədən müvəqqəti olaraq imtina etmək lazımdır. İstifadə qaydası və dozası Osteoartrit: 30 mq gündə bir dəfə, ehtiyac olarsa 60 mq-dək artırıla bilər. Revmatoid artriti və ankilozlaşan spondilit: 60 mq gündə bir dəfə, ehtiyac olarsa 90 mq-dək artırıla bilər. Kəskin ağrılı vəziyyətlər: yalnız ağrı dövründə istifadə oluna bilər. Podaqra: yalnız kəskin ağrılı dövrdə 120 mq gündə bir dəfə, maksimum 8 gün müddətində istifadə oluna bilər. Dental əməliyyatdan sonrakı ağrı: 90 mq gündə bir dəfə, maksimum 3 gün müddətində istifadə oluna bilər. Qaraciyərin yüngül patologiyası zamanı sutkada maksimum 60 mq, orta ağırlıqlı patologiyası zamanı maksimum 30 mq qəbul oluna bilər Əlavə təsirləri Həzm sisteminə: tez-tez – epiqastral nahiyədə ağrı, ürəkbulanma, ishal, dispepsiya, meteorizm; bəzən – köp, gəyirmə, peristaltikanın qüvvətlənməsi, qəbizlik, ağzın selikli qişasının quruluğu, qastrit, mədə və ya 12 barmaq bağırsağın xorası, qıcıqlanmış bağırsaq sindromu, ezofagit, ağzın selikli qişasının xoraları, qusma; çox nadir hallarda – mədə və 12 barmaq bağırsağın xoraları (qanaxma və ya perforasiya ilə), hepatit. Sinir sisteminə: tez-tez – başağrı, başgicəllənmə, zəiflik; bəzən – dad hissinin dəyişilməsi, yuxululuq, hissiyyatın pozulması, o cümlədən paresteziyalar/hiperesteziyalar, həyəcan, depressiya, konsentrasiya pozulması; çox nadir hallarda – hallüsinasiyalar, huşun dumanlanması. Hissiyyat üzvlərinə: bəzən – görmənin qeyri-dəqiq olması, konyunktivit, qulaqlarda küy, vertiqo. Sidikçıxarıcı sistemə: bəzən – proteinuriya; çox nadir hallarda – böyrək çatışmazlığı (adətən dərmanın qəbulu dayandırıldıqda keçib gedir) Allergik reaksiyalar: çox nadir hallarda – anafilaktik/anafilaktoid reaksiyalar (o cümlədən AT-in şiddətli enməsi və şok) Ürək-damar sisteminə: tez-tez – ürəkdöyünmə, AT-in yüksəlməsi; bəzən – istilik tutmaları, beyin qan dövranının pozulması, qulaqcıqların fibrilyasiyası, durğunluqlu ürək çatışmazlığı, EKQ-nın qeyri-spesifik dəyişiklikləri, miokard infarktı; çox nadir hallarda – hipertonik kriz. Tənəffüs sisteminə: bəzən – öskürək, təngnəfəslik, burun qanaxması; çox nadir hallarda – bronxospazm. Dəri reaksiyaları: tez-tez – ekximozlar; bəzən – üzün ödemləşməsi, dəridə qaşınma, səpgi; çox nadir hallarda – övrə, Stivens-Conson sindromu, Layell sindromu. İnfeksion ağırlaşmalar: bəzən – qastroenterit, yuxarı tənəffüs və sidikçıxarıcı yolların infeksiyaları. Sümük-əzələ sisteminə: bəzən – əzələ qıcolmaları, artralgiya, mialgiya. Maddələr mübadiləsinə: tez-tez – ödemlər, mayenin ləngiməsi; bəzən – iştahanın dəyişilməsi, bədən çəkisinin yüksəlməsi. Laborator dəyişikliklər: tez-tez – qaraciyər transaminazalarının aktivliyinin yüksəlməsi; bəzən – qanda və sidikdə azotun səviyyəsinin yüksəlməsi, YFK aktivliyinin yüksəlməsi, hematokritin azalması, hemoqlobinin səviyyəsinin enməsi, hiperkaliemiya, leykopeniya, trombositopeniya, plazmada kreatininin səviyyəsinin yüksəlməsi, sidik turşusunun səviyyəsinin yüksəlməsi; nadir hallarda – qan plazmasında natriumun səviyyəsinin yüksəlməsi. Digər: tez-tez – qripəbənzər sindrom; bəzən – döş qəfəsində ağrı. Doza həddinin aşılması Doza artıqlığı zamanı müşahidə olunan əsas əlamətlər MBT tərəfindən və kardiorenal əlamətlər olmuşdur. Doza artıqlığı zamanı dəstəkləyici tədbirləri həyata keçirmək lazımdır, məs.: MBT-dan sorulmamış preparatın xaric olunması, klinik müşahidə, ehtiyac olduqda dəstəkləyici müalicə. Hemodializ zamanı etorikoksib eliminasiya olunmur. Buraxılış forması 10 tablet Alü/Alü blisterdə. 2 və ya 3 blister içlik vərəqə ilə birlikdə karton qutuya qablaşdırılır. Saxlanma şəraiti 30ºС temperaturdan yüksək olmayan, işıqdan qorumaqla və uşaqların əli çatmayan yerdə, orijinal qablaşmada saxlamaq lazımdır. Yararlılıq müddəti 3 il. Yararlılıq müddəti bitdikdən sonra istifadə etmək olmaz. Aptekdən buraxılma şərti Resept əsasında buraxılır. İstehsalçı GSS Pharma Pvt. Ltd. 7/2-A, Phase-I, G.I.D.C, Pharmaceutıcal Zone, Vatva, Ahmedabad-382445 Gujrat State, India. Qeydiyyat vəsiqəsinin sahibi Darman LLC, Republic of Azerbaijan. Nizami district, Mehdi Abbasov, house 2, A21096, Baku, Republic of Azerbaijan.